(حلوة يا بلدي)

من كام يوم كنت بتكلم مع واحد صحبى وأحنا بنتعشي في مطعم وفجأة سمعنا أغنيه حلوة يا بلدي وهنا لقيت صحبى وشه بيحمر وبيسألنى هو ايه حكاية حلوة يا بلدي اللى طلعت فجأة كدا ؟ كل الناس خلاص فرحانه قوي علشان الرئيس هاييجي مصر؟ اغانى فى مصر , وأعلانات عن أنجازات الرئيس لمصر , قولتله طيب وانت ايه اللى مزعلك؟ ما طبيعى اننا نحب بلدنا .

لقيته بيتنطر ويقولى هوا ايه اللى طبيعى يا جدع انت ؟ ادينى سبب واحد يخلينا نحبها بس
والنبى غير سماها اللى بتظلنا وارضها اللى بتضمنا .


قولتله ولو ان دى من اهم الأسباب لكن هارد عليك برضه واقولك بنحبها ليه


1- نبدأ من البدايه, بمجرد ما الطفل مابيتولد بيلاقى مرتب ليه ورعايه طبيه متميزة وتعليم مجانى محترم يساعدة انه يدخل كليه تناسب ميوله ومهاراته بغض النظر عن مجموعه او درجاته


2- فى الجامعه بيلاقى العدد قليل جدا والدكاترة كتير جدا وكلهم ملتزمين بمواعيدهم وهدفهم الرئيسى توصيل العلم للطالب .

3- بمجرد ما يتخرج بيلاقى فرص عمل كتيرة جدا ومتميزة وبمرتبات خياليه تساعده انه يبدأ حياته مرتاح وعلشان كدا اغلب الشباب بيسيبوا البلد ويهاجروا لأنهم زهقوا من الراحه والحياة السهله



4 - الشقق كتير جدا وبأسعار رمزيه ولو مش مصدقنى اسأل أستشير




5- المواصلات متوفرة جدا, مريحه وفاضيه والشوارع منظمه ورايقه وتقدر توصل من سكنك لشغلك فى ربع ساعه


6- مفيش فى بلدنا حاجه اسمها واسطه او كوسه ولا فيه رشاوى ولا اكراميات ولا فيه سوء استغلال سلطه ولا ديكتاتوريه ولا توريث حكم ولا تزوير انتخابات ولا قبضه حديديه ولا ناس فى معتقلات ولا............

7- عندك حزب وطني ديمقراطى وتقدر تقول رأيك بصراحه وفى اى وقت وهاتلاقى دايما المسئولين بيقولولك
" اتكلم من القلب اتكلم يا ابن ال..."


وهنا مادريتش الا وصاحبى قام ومسك الكرسى وحسيت أنه هايضربه فى دماغى وبيسيبنى ويمشى وهوا بيشتمنى بطريقه هيستيريه ويقولي كمان أبقي حاسب بقي ياعم كيكو المصري وسبني ومشي
ولحد دلوقت انا مش عارف هوا عمل كدا ليه ؟

انتوا تعرفوا ؟؟؟؟؟؟؟؟

أتصلوا علي رقم
012345678910
وقولولي رأيكم بكل صراحه




ـــــــــــــــــــــــــــــــــــــــــــــــــــــــــــــــــــــــــــــ
ــــــــــــــــــــــــــــــــــــــــــــــــــــــــــــــــــــــــــــ
ـــــــــــــــــــــــــــــــــــــــــــــــــــــــــــــــــــــــــــــ

دا طبعا موضوع ضحك وهزار انما طبعا بلدنا حلوة ولازم نحبها وفعلا لولها مكنش هيبقى لينا وطن تانى ننتمى اليه